10-iyundan 2025/2026 o‘quv yili uchun akademik litseylarga 9-sinf bitiruvchilaridan hujjatlarni my.edu.uz portali orqali onlayn qabul qilish boshlandi. Bu haqda Oliy ta’lim, fan va innovatsiyalar vazirligi xabar bermoqda.
O‘quvchilar ro‘yxatdan o‘tish jarayonida tizimga ID-karta yoki tug‘ilganlik haqidagi guvohnoma ma’lumotlarini kiritish bilan birga quyidagi hujjatlarni elektron shaklda (PDF, JPEG) yuklashlari lozim:
• 3,5x4,5 sm o‘lchamdagi 1 ta rangli fotosurat;
• O‘qishga imtiyozli kirish huquqini beruvchi hujjatlar – fan olimpiadasi g‘olibi ekanligini tasdiqlovchi diplom, chet tili va umumta’lim fanlarni bilish darajasi to‘g‘risidagi milliy yoki xalqaro sertifikat (mavjud bo‘lsa).
Abituriyent bitta yo‘nalish bo‘yicha ta’lim tili bir xil bo‘lgan uchtagacha akademik litseyni tanlashi, shuningdek, test sinovi topshiriladigan chet tilini ko‘rsatishi mumkin.
Testlar ariza topshirishda tanlangan hududda o‘tkaziladi. Hujjatlarni qabul qilish 10-iyul kuni yakunlanadi.
Izoh