“BBC Travel” global media portalining ma’lumotlariga ko‘ra, O‘zbekiston 2025-yilda sayohat qilish uchun eng yaxshi 25 ta yo‘nalish ro‘yxatiga kiritildi.
Maqolada ta’kidlanishicha, turizm O‘zbekistonning o‘ziga xos an’analari va madaniy merosini saqlash strategiyasining muhim qismiga aylanib bormoqda. Mamlakat infratuzilmani jadal rivojlantirmoqda: yangi mehmonxonalar, yuqori tezlikdagi temir yo‘l marshrutlari, ichki aviareyslar va yangilangan madaniy diqqatga sazovor joylar sayohatchilar uchun unikal imkoniyatlarni yaratmoqda. Bularning barchasi iqtisodiy o‘sishni rag‘batlantirishga va O‘zbekiston tarixiy va madaniy merosining cheksiz boyligini kashf etayotgan sayyohlarni jalb qilishga yordam bermoqda.
“90 dan ortiq mamlakatning, jumladan, Buyuk Britaniya, Kanada va Avstraliya fuqarolari O‘zbekistonga vizasiz tashrif buyurishlari mumkinligi sayohatni sezilarli darajada osonlashtiradi va sayyohlar uchun yangi imkoniyatlar eshigini ochadi”, – deyiladi xabarda.
Bundan tashqari, qo‘shni mamlakatlar bilan chegarani kesib o‘tish ancha osonlashdi. 2024-yilning noyabr oyida Qozog‘iston va O‘zbekistonni bog‘lovchi "Ipak yo‘li temir yo‘l sayohati" nomli birinchi xalqaro temir yo‘l yo‘nalishi ishga tushirildi. Bu qulay yo‘nalish sayyohlarga Buyuk Ipak yo‘li izidan borib, har ikki davlatning noyob tarixiy va madaniy diqqatga sazovor joylarini bemalol o‘rganish imkonini beradi. “BBC Travel” xulosasiga ko‘ra, bunday sayohat nafaqat qadimiy savdo va madaniy almashuvlar muhitiga sho‘ng‘ish, balki mintaqada madaniy aloqalarni kengaytirish va turizmni rivojlantirish uchun yangi imkoniyatlar yaratadi.
Ro‘yxatga AQSh, Kanada, Yaponiya, Italiya, Avstraliya, Marokash, Angliya va boshqa davlatlar ham kiritilgan.
Izoh