O‘zbekiston terma jamoasi 4-9 noyabr kunlari Astanada bo‘lib o‘tgan kattalar o‘rtasidagi kurash bo‘yicha XV jahon chempionatining umumjamoa hisobida birinchi o‘rinni egalladi. O‘zbekistonlik polvonlar 13 ta medal — to‘qqizta oltin, uchta kumush va bitta bronza medalini qo‘lga kiritdi, deb xabar beradi O‘zbekiston Sport vazirligi.
Akbar Urolov (73 kg gacha), Ahror Ziyodullayev (81 kg gacha), Jahongir Mamatrahimov (100 kg gacha) va Bekmurod Oltiboyev (120 kg dan yuqori) jahon chempioniga aylandi. Ayollar o‘rtasida esa Maftuna Holmatova (48 kg gacha), Hilola Ortiqboyeva (52 kg gacha), Ibodatxon A’ojonova (57 kg gacha), Azoda Medetbayeva (70 kg gacha) va Pokizaxon Kamoldinova (78 kg gacha) oltin medalni qo‘lga kiritdi.
Kumush medallarni Bahrombek Atoyev (66 kg gacha), Jerali Jo‘rayev (120 kg gacha) va Charos Abdullayeva (87 kg gacha) qo‘lga kiritdi. Bronza medali esa Quvonchbek Sadinovga (60 kg gacha) nasib etdi.
Turnirda jami 16 ta vazn toifasida medallar uchun bahslar o‘tkazildi. Umumjamoa hisobida ikkinchi o‘rinni Qozog‘iston, uchinchi o‘rinni esa Tojikiston terma jamoasi egalladi.
Izoh